ភ្នំពេញ៖ អាជ្ញាធរបានឃាត់ខ្លួនជនសង្ស័យម្នាក់ដែលជាថៅកែហាងម៉ាស្សាចំនួន ២ទីតាំង នៅថ្ងៃទី០៧ ខែធ្នូ ឆ្នាំ២០២២ ក្រោយប្រព្រឹត្តអំពើសញ្ចារកម្មមា ឬអនុញ្ញាតឱ្យកន្លែងហាងម៉ាស្សានោះប្រព្រឹត្តអំពើពេស្យាចារ។
ហាងម៉ាស្សា២កន្លែងនោះមាននៅផ្ទះលេខ៣៣ ផ្លូវបេតុង សង្កាត់កន្ទោក ខណ្ឌកំបូល រាជធានីភ្នំពេញ ដោយមានយីហោកុលាបក្រហម១៦៨ ដែលមាននារីម៉ាស្សាចំនួន ២នាក់ ហើយហាងម៉ាស្សាមួយទីតាំងទៀតគ្មានដាក់ស្លាកយីហោ ស្ថិតនៅផ្ទះលេខ២៨១ ផ្លូវបេតុងទី១ សង្កាត់កន្ទោក ខណ្ឌកំបូល រាជធានីភ្នំពេញ មាននារីម៉ាស្សាចំនួន ៦នាក់ អនីតិជនចំនួន ២នាក់។
អាជ្ញាធរបានដកហូតវត្ថុតាងមួយ ស្រោមអនាម័យប្រើប្រាស់រួច និងមិនទាន់ប្រើប្រាស់មួយចំនួន។ បច្ចុប្បន្នអាជ្ញាធរកំពុងកសាងសំណុំរឿង បញ្ជូនជនសង្ស័យ និងវត្ថុតាងទៅកាន់សាលាដំបូងរាជធានីភ្នំពេញ។ ចំណែកជនរងគ្រោះចំនួន ៦នាក់ អនីតិជនចំនួន ២នាក់ ត្រូវបានបញ្ជូនទៅមន្ទីរសង្គមកិច្ចរាជធានីភ្នំពេញ។
យោងតាមច្បាប់នៃក្រមព្រហ្មទណ្ឌ ត្រង់មាត្រា២៨៤ បុគ្គលដែលប្រព្រឹត្តអំពើសញ្ចារកម្ម ក្នុងករណីទាញយកអត្ថប្រយោជន៍ហិរញ្ញវត្ថុពីអំពើពេស្យាចាររបស់អ្នកដទៃ ជួយ ឬការពារអំពើពេស្យាចាររបស់អ្នកដទៃ ឬរៀបចំតាមគ្រប់មធ្យោបាយនូវសកម្មភាពពេស្យាចារ, ការអូសទាញ ឬគាបសង្កត់លើបុគ្គលណាមួយឱ្យធ្វើអំពើពេស្យាចារ បុគ្គលនោះត្រូវផ្តន្ទាទោសដាក់ពន្ធនាគារពី២ ទៅ៥ឆ្នាំ និងពិន័យជាប្រាក់ពី ៤លានរៀលទៅ ១០លានរៀល៕
